di Manfredi “Freddy” Adamo
Da quant’anne il Napoli nunn joca cchiù ‘a dummeneca pomeriggio? M’arricordo, quanno ‘a salute me deva cunfedenza, ca ce ne partevemo ‘a coppa ‘e Quartiere cu na bella marenna “capisce a mme”, tutta ‘nzevata* cu’ mulignane e fasule, mmiezo a nu palatone rigorosamente accattato ‘nterra via Toledo quanno asceva ‘a primma Messa. Che pruffumo, che delizia. Na reliquia astipata fino a dint’ ‘a curva! Doppo magnato, tutte quante a ffa sta grande coreografia a specchiette p’ ‘o sole cu ‘a carta stagnola. ‘O meglie ‘e nuje, Nunzio d’ ‘a Piazza (Dante), ‘e vvote purtava na marenna ‘e cchiù, sapenno ca quaccheduno s’ ‘a stentava… ‘A bonanema ‘e mammà me deva sempe nu vaso e quanno turnavamo ‘a casa, ormai quanno ‘o sole sbaneva addereto Pusilleco, si ‘o Napule venceva, me ne deva n’ato, e chill’ato paro ca m’astipavo, a sera a sera, erano pe’ Patrizziella mia ca m’aspettava ‘ncoppa ‘o Corso Emanuele p’ ammirà ‘e lluce ‘e sta città, comme a dduie palumme. Unico svago domenicale prima della Domenica Sportiva. ‘O riesto d’ ‘e juorne sempre dinto ‘e viche cu’ patemo Ferdinando pe’ cercà ‘e vennere quacche panno. Ma mò nun se capisce cchiù niente. Penzate: ‘a partita ‘e sei e mmeza! Jàmme… Ajere ssera tenevo ancora ‘e chiuove ‘nfronte*. Difatti muglierema, cuoca sopraffina, nun m’ha fatto mancà niente, almeno ‘a dummeneca ‘e ccose s’hanna fa comme si deve. Rraù rigorosamente pippeato pe’ 7-8 ore cu’ pacchere e ricotta, carne e nu poco ‘e frutta. ‘E ppaste ll’aveva purtate ‘o nepote ‘e Zì Peppe. Che vvulite fa, nu quarto ‘e vino dint’ ‘a capa ‘e morte, e t’adduorme comme a nu piro sicco. Nun aggio avuto manco ‘o tiempo ‘e salutà a ‘On Salvatore, grande tifoso solitario comm’ a mme, che la partita del mio Napule accominciava… Vuò vedé ca, a finale, ll’unica cosa bbona a perdere cu ‘e Purtuvalle è che se jocarrà a orario ‘e cristiane??
E intanto chiove a zeffunne*. Pare na bella partita ma che vvulite fa, secondo me, si nun faje gol, dalle e dalle ‘o cucuzziello addeventa tallo!!* E non è la prima volta: difatti dint’ ‘a semmana in Coppa Uefa (je ‘a chiammo ancora accussì) ma quante gol ci simme magnate? Intanto ‘o nennillo se sta spumpanno troppo, ma quanta cose adda fa? Annanze, areto, marca a chillo, passa a chist’ato, prova a scartà, a tirà? Jammo ca te manca sulo ‘o gol… Eqqueqquà…’o vvide? Alla loro prima occasione, ce ‘nfilano. Per chiudere sull’attaccante, Ghoulam è stato espulso, ma ha pigliato ‘o pallone!! Noooo arbitro!! Ma chi è? Tagliavento?? …e te pareva!? Tiene cchiù ccorna tu ca nu cato ‘e maruzze* (ce stevo ‘ncopp’ ‘o stadio quanno “declamaino” sta poesia per la primma volta)! ‘O vvide? Se capisce pecché te chiamme Tagliavento: dipente sicuramente dalle escrescenzie osse che puorti in testa, fossero aerodinamiche?? Appunto, ca “tagliano ‘o viento”? Ma rimane sempre il probblemo del gollo. Tantu burdello, belle giocate, ma nun signammo! Patrizia me porta ‘o ccafé ma stongo nu pucurillo ‘ntussecato, comme facimmo a resistere in 10? Sperammo che “Don Rafele ‘ncoppa ‘a panchina” cunosce a Trapattoni e al momento giusto ‘nfila a quaccheduno. Scusate, difendersi bene mica è un disonore? E intanto Don Salvatore nun se vede ‘ncoppa ‘a fenesta soia, sarraje ca chiove. Starraje suffrenno pure isso, ma ‘e guagliune stasera stanno jucanno bbuono, almeno ce mettono ‘o core, ma se stanno stancanno troppo. I viola sanno jucà ‘o pallone, nuje quanno putimmo attaccammo, Calleò sta pe’ tutte parte, Hamsik menu male s’è ripigliato, Lorenzuccio pare nu pazzo, ma ‘a difesa sta suffrenno, praticamente non abbiamo laterali e lloro jocano sempe largo. Si fosse a “Don Rafele ‘ncoppa ‘a panchina”, ‘o levasse ‘o frangese! Nun ce ‘a fa cchiù, se vede… Henriq ‘o brasiliano ‘o spustasse ‘ncoppa ‘a fascia, comme a giovedi ‘a passata, e mettesse nu cane ‘e presa annanze ‘a difesa comme a Berami. Bravo! Bene! ‘O mette a Berami, ma nientemeno fa ascì a Higuaìn? Chiaro, vuoi difendere, ma Berami terzino nun se po’ vedé e infatti nun se vede propeto cchiù! ‘A partita fernesce che perdimmo… Pepe esce pe’ nun piglià gol (Matri fa fesso a Albiocco) e sulla stessa azione ‘o frangese invece ‘e marcà, guarda ‘o pallone e se perde ll’ommo suoio. Inevitabile. Si nun te stai accorto, soprattutto ‘a llà dereto, ‘o gol ‘o ‘nchiappe primma o doppo…
Resta una cunsulazione, ca tutte quante songo asciute strutte, è chesto ca vulimmo vedé, e si jucammo sempe cu ‘o sanghe all’uocchie, nuie simmo cuntente e ne perdimmo ancora poche ‘o veramente. Pe’ tramente s’affaccia Don Salvatore e parlammo d’ ‘a partita. Amabilmente e dall’alto della sua saggezza difende a Benitèz. Invece per me no, Calleò doveva rimanere sulla fascia, steva facenno bbuono, pare ca teneva sette vite comme ‘e jatte*, pecché ll’hè spustato annanze? Nunn è peccato a s’astipà nu punto!… “Don Ciro”, me dice placidamente, ‘a coppa a mano, Don Salvatore, “arricurdateve ca chi nun risica nun se cocca cu ‘e ffemmene belle!” Me salutaie e se ne trasette…
Sapite quanno uno tene raggione e nun ‘o può risponnere manco “A”? Accussì nun dicette niente, abbuzzaie nu saluto e me ne jette a cuccà!
*’nzevato = unto, oliato, impiastricciato
*Tenere ‘e chiuove ‘nfronte = soffrire di mal di testa
* Dalle e dalle ‘o cucuzziello addeventa tallo = come per la pianta di zucchine, se non ne raccogli per tempo i frutti diventano foglie
*Cato ‘e maruzze = recipiente colmo di lumache
*Zeffunne = copiosamente
*jatta = gatta
