Il calcio è come il tressette

Torna Extravascio, stavolta don Ciro ci conduce nell'intricato mondo del gioco delle carte.
  • google

    di Manfredi "Freddy" Adams

    Ringrazianno a Dio ‘sti juorne ‘e festa songo passati serenamente, pure ‘o tiempo ‘nce ha dato ‘na mano. A Pasquetta ce simmo truvate annanze ‘o vascio cu’ Don Salvatore, Zì Peppe e Carminiello ‘e coppa ‘o Corallo (ex cinema popolare dove quanno eramo guagliune devano l’avanspettacolo). Pe’ tramente ca se parlava della grande presenzia turistica in città, maje vista tanta ggente a Pasca, avimmo fatta ‘na bbona penzata: Zì Peppe facette ascì nu mazzo ‘e carte e accummenciaimo a gghiucà a tressette! ‘O tressette è troppo bbello, sia comme juoco che pe’ vedé ‘e ffacce d’ ‘e jucature. Don Salvatore, si venceva o si perdeva, da nobile di famiglia, nun faceva ‘na mossa; Carmeniello sapeva quasi tutte ‘e rregole ‘e Chitarrella (nu monaco napulitano ca treciento anne fa ‘nventaie ‘stu juoco) e Zì Peppe ca se ‘ncazzava sempe, e sulamente a tavulino tene ‘o curaggio ‘e appattà cu’ Don Salvatore… Se dice ca ‘o “vero signore” se vede a tavulino. Pecché l’ommo civile sape dominà l’incazzatura, è n’esercizzio educativo. ‘O Tressette è nu juoco ‘e memoria, ‘e strateggia; ‘o “tavulino” è ‘na scola ‘e lealtà e correttezza: è ‘na scola ‘e vita! Quante vvote avite sentuto: “Essere primmo ’e mano”. A “tavulino” sì ‘o primmo a gghiucà, invece, metaforicamente, significa ca sì ‘o primmo a avè ‘a possibilità ‘e dicere o fà coccòsa. E quanno siente ‘e dicere: “Vo fà semp’isso carte”? E’ uno ca vole avè sempe raggione, vole cummannà; “Passà ’a mana” è apposta pe’ chille ca se ritirano, ca se astèneno da ‘o ffà ‘na cosa ca primma avéveno prummiso ‘e fà; quanno uno, invece, dice bucìe negando l’evidenza, modificando ‘na situazione a proprio vantaggio, se dice ca “cagna ’e ccarte nterra”, oppure ‘ntavula. A finale Don Salvatore perdette.

    ‘Na meza birra pe’ tutte quante e fernette pure Pasquetta.

    Hai voglia ‘e sapè tutte ‘e rregule…’o riesto ‘o ffà ‘a furtuna. Tale e quale alla partita del Napule contro all’Intèr. Mazzarri, che l’anno passato steva cu’nnuie, ha cercato ‘e mmiscà quacche ccosa, ma ‘o Napule è stato tuosto e nunn ha avuto furtuna. Chillu palo ‘e Inler ancora sta tremmanno ‘nterra San Siro… pe’ nun parlà delle occasioni del “torero triste” Callejon, subbeto accumenciata ‘a partita, e ‘a doppia occasione Pipita-“vruocculilllo* di Brussél”(Mertens). Nun ce stà niente ‘a fa: comme ‘o Tressette, e comme nella vita, pure ‘o pallone è quistione ‘e furtuna. ‘A palla pe’ nu centimmetro nun trase, pe’ nu centimmetro nun c’arrive, a risico pure ‘e te fa male, comme è succiesso al nostro goleador. Sperammo ca è cosa ‘e niente, s’è fatto male pe’ correre appriesso a na palla troppo longa. Ma nuie chesto vulimmo vedé sempe: tanta voglia e tanta lotta. Sperammo ca sta bbuono per la Finale di Coppa Italia. 

    Urdema annotazione ‘a faccio per il nostro Marekiaro. Ha fatto 300 partite con la maglia azzurra. Un esempio, ‘na perzona seria, pate ‘e figlie e che nun penza sulamente ‘e denare comme hanno fatto paricchie ‘e lloro primma ‘e isso! Dint’ ‘o pallone quanta jucature se vottano a ffà ‘notte, quante ‘e lloro se jocano ‘a bulletta e te fanno schifà stu munno… Sì gruosso Marechià!! Un modello da seguire!

    Marek, dopo “Palo ‘e fierro”, Totonno e Ferrario (avanti di 10 presenze) tu sei il campione della grande continuità del progetto pe’ vencere quacche ccosa. Vai annanzi per la tua strada e stamme a sentì:

    Nun abbadà a zifere ‘e viente!!*

     

    *vruoccolillo = broccoletto

    *Nun abbadà a zifere ‘e viente = Non far caso a tutto quello che senti dire

    Condividi questo post