Oramai ste ppartite mmiez’ ‘a semmana songo addeventate troppe. Pe’ ccarità, capisco pure a chille che campano sulo ‘e pallone: ‘o tifoso aspetta ‘a partita comme ‘e pasture a Natale; ‘e giurnale hanna enghiere* paggine e paggine e si vai a vedé, scrivono sempe ‘e stesse ccose; a Napule trasmissione pallonare a centinàra e crapuni ‘gnurante ca parlano senza sapé, songo addeventate comme ‘e diebbete… menumale ca ‘o vascio è vita. Ajere mmatina passaje n’ata vota Donna Lucia, di rosso vestita e ‘o discorso fernette ‘ncoppa ‘a partita. ‘O ssape ca songo tifoso e me sfruculèa, beata a essa quant’ è bbella! “Don Ciro,” me facette, “vi arricordate le partite alla radietta?” E comme no si m’arricordo!? ‘E vvote jevo ‘o stadio e nun m’ ‘a staccavo d’ ‘e rrecchie. Vuoi per sentire il risultato dai campi, vuoi per sentire come descrivevano ‘na jucata sopraffina. E quanno ‘o Napule jucava fore casa? Alle due e mezza, doppo magnato, rieccomi azzeccato alla radietta e me facevo curaggio: la frase più bella era “Napoli in vantaggio!!”

Eh sì Donna Lucì, ati tiempe ma forse meglie. Nun ce stevano appìcceche*, sulamente “Evviva” la propria squadra e basta. Mò chi la Capitale vo’ appiccià, chi ‘o Vesuvio vo’ scetà, ‘o Terrone s’adda lavà. Brutto, brutto assaje… ma addò jamme a fernì? Napule e napulitane sempe ‘mmocca a tutte quante, né: ma nun v’abbasta quanta vote ve ‘mparammo a campà? Primma c’avite unito (o forse erano ‘e sorde d’ ‘e Banche napulitane ca v’hanno dato ‘ncapo?) e mò ce vulite caccià? Pigliate esempio, Catania-Napoli una festa sulle tribune. Je guardavo pe’ televisione e vulevo dà tre punti a tutte e ddoje… Il risultato? Quanno ce sta na festa ‘ncoppa ‘e tribune il risultato passa in secondo piano.

No, vulimmo parlà d’ ‘o risultato? E parlammo d’ ‘o risultato. DInt’ ‘o vico sento a tanta guagliune che lle piace il calcio inglese. Dovete sentire quando parlano dei risultati: 5-1, 4-4, 0-3, 2-4 comme se joca bbello, che squatre all’attacco. E mò ca pure nuje avimmo fatto stu bellu risultato? Mo’ ca pure nuje ce putessemo vantà d’ ‘e quatte gol fore casa? Ehhh… nooo che schifo, che difesa, Brivitòs nunn’è bbuono, Albiol tene a’bbiocco, Réveillère s’arricorda ‘o cippo a Furcella*, ‘Nzigne ‘nzegna, nun fa mai gol… E dammucèlla una cunzulazione a chillu ciacione* d’ ‘o mistér!!.. Che songo sti vvutate ‘e mente*? Facimmolo faticà e ce portarrà belle suddisfazione nella nostra amata Capitale! A ‘a sfrunnata ‘e ll’albere ne parlammo*: né… n’arraggia visto scieme doppo tant’anne ‘e pallone? Il Carosello Napoletano è appena accuminciato, pure Don Salvatore, da quando nce stà Benitèz lo dice sempre: “’A bbona campana se sente ‘a luntano!”

Parola d’ordine: Dimenziona Europea!

 

* enghiere = riempire

*appìcceche = litigi, bisticci

* ciacione = bonario simpaticone

* s’arricorda ‘o cippo a Furcella = è vecchio

*vutate ‘e mente = cambiare opinione repentinamente

* A ‘a sfrunnata ‘e ll’albere ne parlammo = Vedrete, ne riparleremo in seguito