Stammatina Napule prufummava ‘e primmavera. N’aria fina se ‘mpizzava pe’ ddint’ ‘e viche, pareva ca ‘o mare steva a dduie passe. Comme ogne dummeneca a primma matina, dint’ a sti viche cupe arriva pure ll’addore ‘e ogne bbene ‘e Ddie. E si ogne dummeneca è mio dovere tené ‘o vascio na pupata*, pecché passa cchiù gente, ‘o dovere di ogne bbona femmena ‘e casa è cucenà. Donna Patrizia, muglierema affizzionata, accattaie ‘e lupini (‘e vvongole songo di allevamento) e steva ggià mettendo mano, col suo inseparabile mantesino*, alla preparazione. ‘E lupini hanna cagnà acqua ogne ora accussì sperdono la rena*, poi nella tiella, aglio, uoglio e pummarulelle ‘e piennolo fanno ‘o riesto. A ffinale, dint’ ‘a tiella, a fiamma grossa, s’aunisce il petrosino scafazzato* prima di servire, e ‘na ponta ‘e cerasiello. M’aggio cunzulato. Dint’ ‘o vascio se senteva che ‘o rre della tavola era ‘o rraù, ma a me chest’aria marina m’ha fatto venì stu vulìo, linguine ai lupini e frittura ‘e paranza!
Napule però nunn’è sulamente chesto: Napule è pure generosità, fratellanza, aiuto a chi sta pegge ‘e nuje! Pecché ve dico chesto? Stateme a sentì. S’avvecina Pasca, e cinche bbelle scugnizzelle stanno appriparanno ‘na festa pe’ ‘e ccriature sfurtunate dell’Ospedale di Pusilleco. Sti scugnizzelle determinate comme a brigantesse (Bruna, Ilaria, Luciana, Lulù, Sara e Valentina) stanno girando pe’ tutta Napule pecchè ‘o 18 abbrile vanno a ffà visita a chelle ccriature augurànnole ‘e guarì ampressa, e rinascere appunto, pecché Pasca significa RINASCITA! Pure a Natale s’arrecurdaieno ‘e sti ‘ngiulille sfurtunate. Chesta è na grande iniziativa, dàmmele ‘na mano, se ritenete giusto faciteme sapè. Sti gguaglione arrecoglieno sulamente ova ‘e ciucculata non artiggianale e, parlanno parlanno, me facette piacere che ‘o ffanno sulamente pe’ ddà nu pucurillo ‘e felicità a chi cumbatte, accussì piccerille, pe’ campà, pe’ essere criature ccomme all’ate… Inzomma stammatina nun s’è ‘mpizzata sulamente aria ‘e primmavera dint’ a sti viche cupe, ma pure ‘na granda speranza: ‘a ggente nosta è gente ‘e core! Chi vale ‘e chhiù? Uno che ffà, o ciento a cummannà? Belle ‘sti gguaglione ‘e Napule, cu nu core tanto, ovvì!!
Fernute ‘e magnà, col ramoscello d’aulivo a tavola (approposito, bona semmana ‘e Pasca a tutte quante) jette pe’ appiccià la tivvù e steva parlando Mister Reja, nostro avversario di giornata. Bella faccia ‘e cuntadino, capille janche e condottiero fino del primo Napoli della nuova era. Che sfizio quanno isso ‘mparaie a dicere “Amma vencere!”: Vencette ‘a serie B, se mettette a chiagnere e dichiaraje ammore eterno a ‘sta città. Chi, furastiero, vene a Napule, chiagne tre vvote, sissignore tré! Quanno vene, quanno se ne va e quanno ‘a penza!! Bravo Mister ogne vvota ca te veco contro a nnuje nu poco ‘e nustalgia me stregne. Cu’ tte accumenciaje il nuovo Napule, sempe grazzie “capa janca”, pure si mò alliene ‘a Lazzio!
Che bellezza, avimmo fatto quatto golle! Nientemeno s’è scatenato ‘o Pipita, ‘na tripletta, ‘nzieme a nnuie maje fatta fino ‘e mmò, ma primma, la solita doce durmuta aprilegna, ce ha fatto suffrì pe’ quasi tutto ‘o primo tempo. Lazzio in vantaggio fino alla varrata* d’ ‘o cavoletto di Brussel che pareggia la contesa: purtiè… apara!! T’ ‘a metto dint’ ‘o sette! Che parabola perfetta, che cannetta! ‘O sicondo tiempo avimmo fatto ‘a prestazione: ‘na reazzione ca m’ha fatto arrecurdà proprio contro ‘a Lazzio tre anni fa, sempe ‘o San Paolo, una delle partite cchiù emozzionante maje viste: doppio sotto (0-2) con pareggio (2-2). Già eramo cuntente. Po’ lloro fanno ‘o 2-3 a vinte minuti dalla fine. A ddiece minute d’ ‘o tripplice fischio pariggiaemo cu’ Cavani a rigore. Si eramo cuntente primma figurammece mò, recuperà tre ggoll… Ma la maggìa finale, chill’arcobbaleno d’ ‘o Matador (4-3) nell’azzurro del cielo partenopeo facette addeventà chella partita da scrivere dint’ ‘e libbri! Ogge n’ati qquatto gol, stesso risultato pure all’andata a Roma; si jucassemo sempe contro a lloro, ahahahah, lo spettacolo e le vittorie fossero assicurate. M’ha fatto assaje piacere ca nu napulitano ha purtato ‘a fascia ‘e capitano pe’ ‘a squadra d’ ‘a città soja, po’ essere ca Lorenzuccio è stato ‘o cchiù ggiovine della storia. Bravo a pachialone ‘ncoppa ‘a panchina, me staje sempe cchiù simpatico!!
...E comme dicette Rafaniello mò me faccio nu bicchieriello!
* Tengo ‘o vascio na pupata = mantengo il “basso” pulito
*mantesino = grembiule
*rena = sabbia
* scafazzato = tritato
*varrata = pesante colpo inflitto con una mazza
