di Manfredi "Freddy" Adamo

Dummeneca, finalmente se joca ‘e dummeneca. ‘A gente passa annanze ‘o vascio. La dummeneca mmatina si commentano le notizie. Se sente dicere che Napule è sempe zinzoleata*. Facitece caso, quanno se parla bbuono ‘e Napule ce stanno sempe ‘e giurnale ca te pittano malamente, pe’ nun parlà d’ ‘e ttelevisione... Accussì comme succedette pe’ ‘e vvarche di Coppa America, bella reclame per Napoli veduta in tutto il Mondo, addò ‘e mmeriuse* ce pittaino problemi di Napoli in quantità, accussì è succieso pure ogge: jocano cu’ ‘e racchette a tennìss, Napule ed il suo panorama che fa annammurà a tutte quante, e arriva il tiggì e te spara ‘na voraggine, ‘na casa caduta, l’ambulante… Sempe pe’ scredità la bellezza di Napoli. Ma si pe’ quaccheduno chiste songo probblemi, avita sapè cari miei, ca a Napule ‘o venditore ambulante è na figura professionale. ‘O ssapite ca je m’arricordo ancora quanno passava ‘o cerasaro* e ddiceva: “So’ melelle ste cerase, dduje muorze ll'une”. Per dimustrare la buntà e la grandezza delle sue cerase! ‘O Marketting è nato a Napule!! E intanto ‘e ggiurnale venneno e se fanno ‘e sòrde. Ecco pecchè se chiammano “quotidiani”, lle fanno abbuscà ‘o ppane tutte ‘e juorne, pure cu nu cuofano ‘e stru…mbettate! Ce vo’ pacienza, ma pure attenzione! Rispondiamo che Napule ll’hanna cunoscere meglie pecché è WONDEFFULL, comme dice Totonno ‘o Mericano, amico mio nato niro e che va e vvene da Nuova Yorke.

Visto che il Napule nuosto giocava di sera, muglierema me sta abbituanno bbuono. Doppo ‘a cuntrora se mette, s’organizza e ‘nciarma tre, quatto pezze ‘e pasta*, po’, quanno s’avvicina ll’ora d’ ‘a partita, allarga e distenne ‘e ppezze cu ‘e ppalme d’ ‘e mmane, conza con polpa di sammarzano scafazzato* e sistema le felle di muzzarella RIGOROSAMENTE disposte a petalo di margherita, attuorno ad una foglia di vasinicola. Si, pecché nuje ce tenimmo alla tradizione e facimmo ‘a “Pizza margarita” accussì comme nascette nel primmo Ottuciento. Nonsignore, nunn’ è ‘o vero che s’ ‘a ‘nventaino pe’ s’abbabbià* la Regina Margherita moglie del Savoia, la prova evidente è che alla Reggia borbonica di Capodimonte facettero nu furno appositamente costruito per le pizze, tanto desiderate dalla Riggina origginale, Maria Carolina. La partita contro il Parma ‘o veramente m’ispirava cchiù na bella parmiggiana ‘e mulignane, ma datosi ca nun songo cchiù nu guagliunciello e songo cchiù vecino alla settantina che alla sessantina, na cosa pesante, pure se bbona assaje, nunn’era ‘o caso. E la pizza di muglierema quanno jucammo ‘e sera ormai è diventata tradizzione!

Nella partita pareva ca ‘o Napule jucasse comme ‘a jatta cu ‘o sorece: votta a me, tira a te ma l’affondo decisivo  nunn’arrivava maje. Quand’è ca c’avimma pruvato? Sulamente a finale, doppo ll’unico tiro a porta d’ ‘o Parma ca, ciorta ha voluto, hanno fatto pure gol! Eh si ca se songo scetate! Tutte annanze ma niente ‘a fa… Una, ddoje vote ‘nterra nell’aria di rigore: ma ‘e rigori a nnuie nunn ’e ddanno? Ce vuleva Mertens pe’ ce scetà llà annanze? Troppo musci  e troppo tardi… Sta squadra pare immatura. Contro ‘e squadrune pare ca songo unnece assassine, mentre contro a chi joca normale e se difendeno comme a ll’assassine, nun simmo capace ‘e lle chiavà dduje scuppulune pe’ lle fa sta zitte. Dice che il Napoli c’ha ‘e penziere ma ll’unico penziero da tenere era quello di vattere il Parma, sti saglie e scinne fanno spantecà*, e infatti doppo ‘a partita che brutta situazione: ‘o Presidente nuosto ha dato nu buffettone a nu tifoso che lle domandava di vattere, calcisticamente parlando, a tutte le squadre.  ‘O Presidente forse ha capito malamente, ha accummenciato a vattere isso pe’ pprimmo!

Don Salvatore ’a coppa ‘a fenesta soja me guardava e scotoliava* la capa e pensava alla brutta figura sia in campo che fore ‘o campo. “Don Ciro”, me dicette, “Avete visto? Abbiamo fatto i cambi troppo tardi, Don Rafele ‘a coppa ‘a panchina non ha saputo risicare e chi nunn’ave curaggio nun se cocca cu ‘e ffemmene belle…!” Eh….. comme faje a ll’ ‘o dà tuorto? Po’ ll’addumandaje della brutta situazione fore allo stadio del Parma e lle dicette ca pure a me m’abbruciavano ‘e mmane  si quaccheduno m’avesse sfuttuto doppo na partita perza, m’avesse truvato stuorto!! E isso: “Io mi arricordo di altri presidenti. Anconetani, Gaucci, Sibilia che pure loro affrontavano la ggente ‘e pietto, ma cumandavano squadre provinciali. Mò cu’ tutto ‘o rispetto per le provinciali, ma ‘o nuosto è stato pruvinciale e pure senza creanza... e mmò? Si quaccheduno ce ‘o ddice ancora, avimma fa pure ‘a figura ‘e chille ca s’hanna stà!” E concluse: ”Bone parole e triste fatte ‘ngannano li sapie e pure li matte!”

*zinzoleare = maltrattare

*mmeriuso = invidioso

*cerasaro = venditore ambulante di ciliegie

* pezze ‘e pasta = i panetti che al forno diventano pizza

*scafazzato = tritato, a pezzetti

*abbabbiarsi quaccheduno = ingannare, arruffianarsi qualcuno, attirare le sue simpatie

* spantecare = Spasimare, anche morire. Lo spanteco è soprattutto d’amore. Dal latino Panticare, ma anche Pantex=pancia

*scotoliare = scuotere